Siðanefnd
Frá því að siðareglur voru samþykktar árið 2001 hefur siðanefnd verið starfandi hjá félaginu. Fyrirspurnir til hennar má senda á netfangið sidanefnd.ii@sigl.is  en benda má á að erindi til siðanefndar skulu berast beint til formanns siðanefndar og vera skrifleg. 

Fyrstu siðanefndina skipuðu: Auður Axelsdóttir, Guðrún Einarsdóttir og Margrét Sigurðardóttir. Nefndin sá um útgáfu siðareglnanna á veggspjaldi og setti sér starfsreglur sem voru samþykktar á aðalfundi Iðjuþjálfafélags Íslands 2003 og fara þær hér á eftir:
 
Starfsreglur siðanefndar Iðjuþjálfafélags Íslands
 
Siðanefnd hefur sett sér eftirfarandi starfsreglur, sem eiga að vera í stöðugri endurskoðun.

1. grein.
Stjórn Iðjuþjálfafélags Íslands tilnefnir siðanefnd, sem tilkynnt skal á aðalfundi félagsins. Í siðanefnd sitja þrír iðjuþjálfar. Leitast skal við að þeir séu af mismunandi starfsvettvangi. Varamenn skulu tilnefndir jafnmargir og með sömu skilyrðum. Nefndarmenn velja sér formann og skipta með sér verkum að öðru leyti.
Til að iðjuþjálfi teljist hæfur til setu í siðanefnd þarf hann að hafa óflekkað mannorð og hafa starfað sem iðjuþjálfi í a.m.k. þrjú ár.
Í siðanefnd skal skipað til tveggja ára í senn. Nefndarmaður má ekki sitja lengur en tvö tímabil samfleytt. Siðanefnd starfar sjálfstætt og óháð stjórn og öðrum nefndum félagsins. Á meðan iðjuþjálfi situr í siðanefnd skal hann ekki vera í stjórn eða öðrum nefndum Iðjuþjálfafélags Íslands.
 
2. grein.
Hlutverk siðanefndar Iðjuþjálfafélags Íslands er að fjalla um mál sem til hennar er vísað og kveða upp úrskurði eftir því sem við á. Þetta geta verið erindi sem henni berast um meint brot á siðareglum Iðjuþjálfafélags Íslands eins og þær eru hverju sinni. Einnig ber siðanefnd að láta sig varða mál, sem fjalla um hagsmuni skjólstæðinga iðjuþjálfa og lífsgæði þeirra, s.s. lagasetningar, heilbrigðismál og annað sem við kemur þjónustu iðjuþjálfa við skjólstæðinga sína.
 
3. grein.
Siðanefnd er skylt að halda gjörðabók þar sem skráðar eru fundargerðir og afgreiðsla mála. Í gjörðabók skal skrá atriði eins og hvenær erindið barst nefndinni, helstu rök málsaðila, niðurstöðu nefndarinnar og forsendur þeirra. Gjörðabók skal varðveitt af formanni siðanefndar.
 
4. grein.
Siðanefnd gætir þagnarskyldu um persónulegar upplýsingar í erindum sem henni berast.
 
5. grein.
Siðanefnd kannar hvort nefndarmaður í siðanefnd sé vanhæfur vegna vináttu-, fjölskyldu- eða annarra tengsla við málsaðila eða vegna eigin hagsmuna. Ef svo er skal hann víkja úr nefndinni í viðkomandi máli. Varamaður skal þá taka sæti hans í nefndinni.
 
6. grein.
Erindi til siðanefndar skulu berast beint til formanns siðanefndar og vera skrifleg. Erindi skal berast til siðanefndar innan 6 mánaða frá því að viðkomandi atburður hefur átt sér stað. Siðanefnd getur veitt undanþágu frá þessum tímamörkum ef sérstakar ástæður liggja að baki.
 
7. grein.
Við upphaf málsmeðferðar kannar siðanefnd hvort þeim kröfum sem siðareglur gera til málshefjanda hafi verið fullnægt (sbr. gr. 3.5 í siðareglum iðjuþjálfa). Sé svo ekki skal máli vísað frá og málshefjanda skýrt skriflega frá orsökum frávísunar. Siðanefnd getur einnig vísað erindi frá telji hún það ekki falla undir sitt verksvið af öðrum ástæðum. Málsaðilum skal tilkynnt um slíka ákvörðun og hún rökstudd. Siðanefnd tekur ekki til umfjöllunar mál sem eru fyrir dómstólum og skal málum vísað frá siðanefnd séu þau kærð til dómstóla.
 
8. grein.
Formaður kallar nefndina saman og stjórnar fundum. Siðanefnd skal bjóða málsaðilum að skýra sjónarmið sín á fundum nefndarinnar. Hún getur einnig óskað eftir skriflegri greinagerð frá málsaðilum. Siðanefnd ákveður hvort viðbótargagna skuli aflað og hvort kalla þurfi fleiri aðila fyrir nefndina. Ef þörf krefur er siðanefnd heimilt að leita sér utanaðkomandi aðstoðar, t.d. aðstoðar siðfræðings og/eða lögfræðings, eftir eðli máls hverju sinni.
 
9. grein.
Heimilt er að draga málið/erindið til baka hvenær sem er áður en siðanefnd hefur kveðið upp úrskurð sinn.
 
10. grein.
Þegar siðanefnd telur mál nægilega upplýst skal hún kveða upp úrskurð. Úrskurð skal kveða upp eins fljótt og auðið er, þó eigi síðar en sex mánuðum eftir að erindi berst siðanefnd nema sérstakar ástæður liggi að baki. Úrskurður skal vera skriflegur, studdur rökum og fari eftir vilja meirihluta nefndarinnar. Minnihluta nefndarinnar er heimilt að birta sérálit. Úrskurður siðanefndar getur falið í sér eftirfarandi:

A. Frávísun máls. 
B. Að ekki hafi verið brotið gegn siðareglum iðjuþjálfa. 
C. Að brotið hafi verið gegn siðareglum iðjuþjálfa. Ef siðanefnd úrskurðar að brotið hafi verið gegn siðareglum iðjuþjálfa skal hún veita áminningu. Áminningar geta ýmist verið munnlegar eða skriflegar allt eftir alvarleika brotsins. Ef um alvarlegt brot er að ræða getur siðanefnd vísað málinu til landlæknis.

11. grein.
Siðanefnd tilkynnir málsaðilum og stjórn Iðjuþjálfafélags Íslands um úrskurði og áminningar innan fjögurra vikna frá uppkvaðningu. Siðanefnd er einnig heimilt að birta úrskurð sinn opinberlega en fyllstu nafnleyndar skal gætt.
 
12. grein.
Starfsreglur þessar voru samþykktar á aðalfundi Iðjuþjálfafélags Íslands 8. mars, 2008 og öðlast gildi frá og með þeim degi.